(ភ្នំពេញ)

នារសៀលថ្ងៃចន្ទ ១១រោច ខែផល្គុន ឆ្នាំរោង ឆស័ក ពុទ្ធស័ករាជ ២៥៦៨ ត្រូវនឹងថ្ងៃទី២៤ ខែមីនា ឆ្នាំ២០២៥ នៅទីស្តីការក្រុមប្រឹក្សាអភិវឌ្ឍន៍កម្ពុជា, ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុក បេសកកម្មពិសេស អនុប្រធានទី ២ ក្រុមប្រឹក្សាអភិវឌ្ឍន៍កម្ពុជា (ក.អ.ក) និង ឯកឧត្តម Park Jung-Wook ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋកូរ៉េ ប្រចាំនៅព្រះរាជាណាចក្រកម្ពុជា បានធ្វើ ជាសហប្រធានដឹកនាំកិច្ចប្រជុំទ្វេភាគីស្តីពីកិច្ចសហប្រតិបត្តិអភិវឌ្ឍន៍រវាងរាជរដ្ឋាភិបាលកម្ពុជា និងរដ្ឋាភិបាល សាធារណរដ្ឋកូរ៉េ ។ កិច្ចប្រជុំនេះ ត្រូវបានរៀបចំឡើងបន្ទាប់ពីកិច្ចប្រជុំពិគ្រោះយោបល់កម្រិតគោលនយោបាយ លើកទី៥ រវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋកូរ៉េ ដែលបានប្រព្រឹត្តទៅប្រកបដោយ ជោគជ័យ កាលពីខែធ្នូ ឆ្នាំ២០២៤ កន្លងទៅ ។ កិច្ចប្រជុំទ្វេភាគី មានគោលបំណងដើម្បីពិនិត្យវឌ្ឍនភាពនៃ កិច្ចសហប្រតិបត្តិការអភិវឌ្ឍន៍ឆ្នាំ២០២៥ គោលនយោបាយនៃការផ្តល់ហិរញ្ញប្បទានរបស់កូរ៉េ និងការធ្វើ បច្ចុប្បន្នភាពយុទ្ធសាស្រ្តភាពជាដៃគូកូរ៉េសម្រាប់កម្ពុជា ព្រមទាំងកំណត់ទិសដៅអាទិភាពសម្រាប់ឆ្នាំ២០២៦ ។

ជាកិច្ចចាប់ផ្តើម ឯកឧត្តមទេសរដ្ឋមន្ត្រី បានសម្តែងសេចក្តីសោមនស្សរីករាយ និងស្វាគមន៍ យ៉ាងកក់ក្តៅចំពោះវត្តមាន ឯកឧត្តមឯកអគ្គរដ្ឋទូត និងបានវាយតម្លៃខ្ពស់ចំពោះកិច្ចសហប្រតិបត្តិការរបស់ រដ្ឋាភិបាលសាធារណរដ្ឋកូរ៉េ ដែលបានចូលរួមចំណែកដល់ការអភិវឌ្ឍន៍សង្គម-សេដ្ឋកិច្ចកម្ពុជា តាមរយៈ ការអនុវត្តយុទ្ធសាស្រ្តភាពជាដៃគូសម្រាប់កម្ពុជា ២០២១-២០២៥ (Country Partnership Strategy for Cambodia 2021-2025) ដែលផ្តោតលើវិស័យអាទិភាពសំខាន់ៗ ចំនួន ៤ គឺ៖ ១) វិស័យអប់រំ, ២) វិស័យ ដឹកជញ្ជូន, ៣) កសិកម្ម និងអភិវឌ្ឍន៍ជនបទ, និង ៤) ការគ្រប់គ្រងទឹក និងសុខមាលភាពសាធារណៈ ។

ឯកឧត្តមទេសរដ្ឋមន្ត្រី បានអបអរសាទរចំពោះការលើកកម្ពស់កិច្ចសហប្រតិបត្តិការទ្វេភាគីទៅជាដៃគូ យុទ្ធសាស្ត្រសម្រាប់កម្ពុជា ដែលបានឯកភាពពីប្រមុខរដ្ឋាភិបាលទាំងពីរកាលពីឆ្នាំ២០២៤ កន្លងទៅ ដែលបង្ហាញអំពីការប្តេជ្ញាចិត្តខ្ពស់របស់រដ្ឋាភិបាលសាធារណរដ្ឋកូរ៉េ ក្នុងការបង្កើនទំហំហិរញ្ញប្បទានអភិវឌ្ឍន៍ផ្លូវការមកកម្ពុជា ។

ជាកិច្ចឆ្លើយតប ឯកឧត្តមឯកអគ្គរដ្ឋទូត បានសម្តែងការអបអរសាទរចំពោះកិច្ចសហប្រតិបត្តិការ អភិវឌ្ឍន៍រវាងប្រទេសទាំងពីរ ។ តាមរយៈដៃគូយុទ្ធសាស្ត្រសម្រាប់កម្ពុជា ឯកឧត្តមឯកអគ្គរដ្ឋទូត បានប្តេជ្ញា ខិតខំពង្រឹង និងពង្រីកកិច្ចសហប្រតិបត្តិការលើគ្រប់វិស័យអាទិភាពរបស់រាជរដ្ឋាភិបាលកម្ពុជា ព្រមទាំងបង្ហាញ ពីចក្ខុវិស័យក្នុងការបង្កើតនូវគម្រោងខ្នាតធំ (Large Scale Project) ក្នុងក្របខ័ណ្ឌហិរញ្ញប្បទានសហប្រតិបត្តិការ អភិវឌ្ឍន៍ ផ្តោតលើប្រសិទ្ធភាព និងការអភិវឌ្ឍន៍ប្រកបដោយបរិយាបន្ន័ ។ ទន្ទឹមនេះ ឯកឧត្តមឯកអគ្គរដ្ឋទូត បានជម្រាបជូនពីបច្ចុប្បន្នភាពនៃការកែសម្រួលយុទ្ធសាស្រ្តភាពជាដៃគូសម្រាប់កម្ពុជា ដោយបានបញ្ចូលនូវវិស័យ អាទិភាពរបស់រាជរដ្ឋាភិបាលកម្ពុជា ហើយការកែសម្រួលនេះគ្រោងនឹងបញ្ចប់ក្នុងត្រីមាសទី២ ឆ្នាំ២០២៥ ។

ភាគីទាំងពីរក៏បានពិភាក្សាផ្លាស់ប្តូរយោបល់លើផែនការហិរញ្ញប្បទានអភិវឌ្ឍន៍ផ្លូវការរបស់រដ្ឋាភិបាល សាធារណរដ្ឋកូរ៉េ ឆ្នាំ២០២៥ និងបេក្ខភាពគម្រោងឆ្នាំ២០២៦ ។ ជាមួយគ្នានេះដែរ, ភាគីទាំងពីរក៏បានពិភាក្សា លើនីតិវិធី និងបែបបទនៃការរៀបចំគម្រោងស្នើសុំហិរញ្ញប្បទានអភិវឌ្ឍន៍ផ្លូវការកូរ៉េ សំដៅលើការពង្រឹង ប្រសិទ្ធភាពនៃកិច្ចសហប្រតិបត្តិការនិងនិរន្តរភាពរបស់គម្រោង ។

ជាកិច្ចបញ្ចប់, ឯកឧត្តមទេសរដ្ឋមន្ត្រី បានសម្តែងនូវអំណរគុណចំពោះកិច្ចខិតខំប្រឹងប្រែង និង ស្នាដៃជាច្រើនរបស់ ឯកឧត្តមឯកអគ្គរដ្ឋទូត ចំពោះប្រទេសកម្ពុជា ព្រមទាំងសហការី រួមទាំងទីភ្នាក់ងារ KOICA ដែលតែងតែផ្តល់កិច្ចសហការយ៉ាងល្អប្រពៃ កន្លងមក និងមានជំនឿថាកិច្ចសហប្រតិបត្តិការទ្វេភាគី កម្ពុជា-សាធារណរដ្ឋកូរ៉េ នឹងកាន់តែរឹងមាំបន្ថែមទៀត ។

សូមគូសបញ្ជាក់ផងដែរថា សាធារណរដ្ឋកូរ៉េ គឺជាដៃគូសហប្រតិបត្តិការយូរអង្វែងរបស់កម្ពុជា ។ សម្រាប់ឆ្នាំ២០២៥ រដ្ឋាភិបាលសាធារណរដ្ឋកូរ៉េ គ្រោងផ្តល់ហិរញ្ញប្បទានអភិវឌ្ឍន៍ផ្លូវការដល់កម្ពុជាទំហំ ប្រមាណ ៣១៥ លានដុល្លារអាមេរិក ដែលធ្វើឱ្យកម្ពុជាឈរក្នុងលំដាប់លេខ ១ បន្ទាប់មកប្រទេសអេហ្សីប ឥណ្ឌូនេស៊ី វៀតណាម និងហ្វីលីពីន ។