(ភ្នំពេញ)

នាព្រឹកថ្ងៃចន្ទ ២រោច ខែស្រាពណ៍ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី១១ ខែសីហា ឆ្នាំ២០២៤ នៅទីស្ដីការក្រុមប្រឹក្សាអភិវឌ្ឍន៍កម្ពុជា, លោកជំទាវ ផាណា វ៉ឺនីដា អគ្គលេខាធិការរងគណៈកម្មាធិការសហប្រតិបត្តិការអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា (គ.ស.អ.ក/ក.អ.ក) បានទទួលជួបសំណេះសំណាលជាមួយ លោក Shin Yonghwa អនុប្រធានទីភ្នាក់ងារសហប្រតិបត្តិការអន្តរជាតិកូរ៉េប្រចាំកម្ពុជា (Korea International Cooperation Agency – KOICA) និងក្រុមអ្នកស្ម័គ្រចិត្តរបស់មិត្តកូរ៉េនៅក្រៅប្រទេសជំនាន់ទី១៦៦ ក្រោមកម្មវិធី World Friends Korea។

ជាកិច្ចចាប់ផ្តើម លោកជំទាវបានថ្លែងអំណរគុណយ៉ាងជ្រាលជ្រៅដល់រដ្ឋាភិបាលសាធារណរដ្ឋកូរ៉េ ដែលបានបញ្ជូនក្រុមអ្នកស្ម័គ្រចិត្តរបស់មិត្តកូរ៉េមកម្ពុជា ។ ក្រុមអ្នកស្ម័គ្រចិត្តកូរ៉េទាំងអស់នេះនឹងត្រូវបំពេញភារកិច្ចនៅតាមស្ថាប័នរបស់រាជរដ្ឋាភិបាលកម្ពុជា ដើម្បីចូលរួមចំណែកលើការពង្រឹងសមត្ថភាព និងការចែករំលែកបទពិសោធន៏លើមុខជំនាញ ដូចជា គិលានុបដ្ឋាក, ប្រព័ន្ធផ្សព្វផ្សាយឌីជីថល, ការអប់រំផ្នែកសម្រស់, និងការបង្រៀនភាសាកូរ៉េ ជាដើម ។

ជាការឆ្លើយតប លោក Shin Yonghwa បានគូសបញ្ជាក់ថា ការជួបសំណេះសំណាលនេះ គឺជាលើកទី២ ជាមួយ គ.ស.អ.ក/ក.អ.ក ដែលបានបញ្ជាក់ពីកិច្ចសហប្រតិបត្តិការយ៉ាងជិតស្និទ្ធរវាងប្រទេសទាំងពីរ​កម្ពុជា-កូរ៉េ ។ ទីភ្នាក់ងារ KOICA នឹងបន្តសហការជាមួយរាជរដ្ឋាភិបាលកម្ពុជាដើម្បីបញ្ជូនអ្នកជំនាញការ និងក្រុមអ្នកស្ម័គ្រចិត្តកូរ៉េបន្ថែមទៀតមកកម្ពុជាដើម្បីឆ្លើយតបនឹងកិច្ចអភិវឌ្ឍន៍នៅកម្ពុជា ។