(ភ្នំពេញ)

នារសៀលថ្ងៃអង្គារ ២រោច ខែភទ្របទ ឆ្នាំម្សាញ់ សប្ដស័ក ព.ស. ២៥៦៩ ត្រូវនឹងថ្ងៃទី៩ ខែកញ្ញា ឆ្នាំ២០២៥នៅទីស្ដីការក្រុមប្រឹក្សាអភិវឌ្ឍន៍កម្ពុជា, ឯកឧត្តម ឈៀង យ៉ាណារ៉ា ទេសរដ្ឋមន្រ្តីទទួលបន្ទុកបេសកកម្មពិសេស អនុប្រធានទី ២ ក្រុមប្រឹក្សាអភិវឌ្ឍន៍កម្ពុជា (ក.អ.ក) បានទទួលជំនួបសម្ដែងការគួរសមនិងពិភាក្សាការងារជាមួយលោក Matthias Giegrich អគ្គនាយក​ទីភ្នាក់ងារកិច្ចសហប្រតិបត្តិការអាល្លឺម៉ង់ GIZ (APLAC) និងចូលរួមដោយលោក Christof Weigelmeier ភារធារីនិងជាប្រធានកិច្ចសហប្រតិបត្តិការអភិវឌ្ឍន៍នៃស្ថានទូតអាល្លឺម៉ង់ និងលោក Matthias Bickel, នាយកប្រចាំប្រទេសកម្ពុជានៃទីភ្នាក់ងារ GIZ រួមជាមួយនឹងសហការីនៃគណៈប្រតិភូអាល្លឺម៉ង់​ ។ គោលដៅចម្បងនៃកិច្ចជំនួបនេះគឺដើម្បីពិភាក្សាការងារលើទិសដៅយុទ្ធសាស្រ្តរបស់គម្រោងការលើកកម្ពស់ភាពប្រកួតប្រជែងនៃសហគ្រាសនៅកម្ពុជា(ICONE) Phase II និងពិគ្រោះគំនិតយោបល់ទៅលើកិច្ចការងារបន្តដើម្បីត្រៀមនូវកិច្ចចរចាកម្ពុជា-អាល្លឺម៉ង់ដែលនឹងប្រព្រឹត្តិឡើងនាខែវិច្ឆិកា​ នៅរាជធានីភ្នំពេញនាពេលខាងមុខនេះ ។

នៅក្នុងកិច្ចជំនួបនេះ ឯកឧត្តមទេសរដ្ឋមន្រ្តី និងលោក Matthias Giegerich បានពិគ្រោះយោបល់ទៅលើទិសដៅនៃកិច្ចសហប្រតិបត្តិការនិងគម្រោងផ្សេងៗរបស់អាល្លឺម៉ង់ដោយផ្អែកលើផលប្រយោជន៍រួមសម្រាប់ប្រទេសទាំងពីរ ។ បន្ថែមពីលើនេះ ឯកឧត្តមទេសរដ្ឋមន្រ្តី ក៏បានលើកឡើងពីគោលដៅនិងវិស័យអាទិភាពនានានៃកិច្ចអភិវឌ្ឍន៍ជាតិរបស់ប្រទេសកម្ពុជា ព្រមទាំងទិសដៅយុទ្ធសាស្រ្តឆ្ពោះទៅដល់ការចាកចេញរបស់ប្រទេសកម្ពុជាចេញពីក្រុមប្រទេសអភិវឌ្ឍន៍តិចតួច ។ ភាគីអាល្លឺម៉ង់បានគូសបញ្ជាក់ពីការបន្តនូវការប្ដេជ្ញាចិត្តក្នុងការចូលរួមគាំទ្រកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការអភិវឌ្ឍន៍សង្គម-សេដ្ឋកិច្ច។