()

នាព្រឹកថ្ងៃព្រហស្បត៍ ៣រោច ខែមាឃ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី៥ ខែកុម្ភៈ ឆ្នាំ២០២៦, នៅទីស្តីការក្រុមប្រឹក្សាអភិវឌ្ឍន៍កម្ពុជា, ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី ២ ក្រុមប្រឹក្សាអភិវឌ្ឍន៍កម្ពុជា បានទទួលជួបសម្តែងការគួរសមជាមួយ ឯកឧត្តម KIM Chang Yong ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋកូរ៉េប្រចាំព្រះរាជាណាចក្រកម្ពុជា ។
ឯកឧត្តមទេសរដ្ឋមន្ត្រី បានសម្តែងនូវការអបអរសាទរចំពោះ ឯកឧត្តម KIM Chang Yong ដែលត្រូវបានតែងតាំងជាឯកអគ្គរដ្ឋទូតនៃសាធារណរដ្ឋកូរ៉េប្រចាំកម្ពុជា ។ ឯកឧត្តមទេសរដ្ឋមន្ត្រី បានកោតសរសើរចំពោះទំនាក់ទំនង និងភាពជាដៃគូកម្ពុជា-កូរ៉េ ដែលត្រូវបានដំឡើងកម្រិតទៅដល់ភាពជាដៃគូយុទ្ធសាស្ត្រ កាលពីដំណើរទស្សនកិច្ចផ្លូវការរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ទៅកាន់សាធារណរដ្ឋកូរ៉េ កាលពីខែឧសភា ឆ្នាំ២០២៤ កន្លងទៅ ។
ឯកឧត្តម KIM Chang Yong បានវាយតម្លៃខ្ពស់ចំពោះវឌ្ឍនភាពដ៏ល្អប្រសើរនៃកិច្ចសហប្រតិបត្តិការប្រកបដោយផ្លែផ្ការវាងកម្ពុជា-កូរ៉េ និងបានបញ្ជាក់ថាក្នុងនាមឯកឧត្តមជាឯកអគ្គរដ្ឋទូតប្រចាំនៅកម្ពុជា ឯកឧត្តមនឹងខិតខំពួនជ្រុំកិច្ចសហប្រតិបត្តិការរវាងប្រទេសទាំងពីរឱ្យមានភាពរឹងមាំបន្តទៀតលើវិស័យសេដ្ឋកិច្ច ពាណិជ្ជកម្ម និងជាពិសេសពង្រីកកិច្ចសហប្រតិប្តិការលើជំនួយអភិវឌ្ឍន៍ផ្លូវការកូរ៉េសម្រាប់កម្ពុជា ដើម្បីរួមចំណែកដល់ការអភិវឌ្ឍសង្គមសេដ្ឋកិច្ចរបស់កម្ពុជា ស្របតាមគោលដៅអាទិភាពនៃយុទ្ធសាស្ត្របញ្ចកោណ ដំណាល់ទី១ របស់រាជរដ្ឋាភិបាលកម្ពុជា ។ ឯកឧត្តមបានជម្រាបជូនអំពី យុទ្ធសាស្រ្តភាពជាដៃគូកូរ៉េសម្រាប់កម្ពុជា ដែលយុទ្ធសាស្រ្តនេះត្រូវបានកែសម្រួលនិងតម្រឹមជាមួយវិស័យអាទិភាពរបស់កម្ពុជា ។ ទន្ទឹមនេះ ឯកឧត្តមបានជម្រាបជូនអំពីការយកចិត្តទុកដាក់របស់រដ្ឋាភិបាលកូរ៉េ ចំពោះប្រជាពលរដ្ឋភាសឹកដែលរងការប៉ះពាល់ពីជម្លោះព្រំដែនកម្ពុជា-ថៃ និងផ្តល់ជំនួយមនុស្សធម៍ដល់ជនភាសឹកកម្ពុជា ។
ឯកឧត្តមទេសរដ្ឋមន្ត្រី ក៏បានថ្លែងអំណរគុណ ដល់រដ្ឋាភិបាលសាធារណរដ្ឋកូរ៉េដែលបានផ្តល់ជំនួយមនុស្សធម៌ដល់ប្រជាពលរដ្ឋភាសឹកកម្ពុជាដែលមានតម្រូវការជាមូលដ្ឋាន និងស្នើសុំដល់ភាគីកូរ៉េបន្តផ្តល់ជំនួយលើវិស័យបោសសម្អាតមីន ផងដែរ ។
ជាចុងក្រោយ ឯកឧត្តមទេសរដ្ឋមន្រ្តី បានជូនពរឯកឧត្តមឯកអគ្គរដ្ឋទូត នៃសាធារណរដ្ឋកូរ៉េឲ្យទទួលបាននូវភាពជោគជ័យ និងបន្តកិច្ចសហប្រតិបត្តិការយ៉ាងជិតស្និទ្ធ ដើម្បីសម្រេចបានលទ្ធផលផ្លែផ្កាបន្តទៀត ។