(ភ្នំពេញ)

នាព្រឹកថ្ងៃព្រហស្បតិ៍ ១រោច ខែភទ្របទ ឆ្នាំជូត ទោស័ក ព.ស.២៥៦៤​ ត្រូវនឹងថ្ងៃទី៣ ខែកញ្ញា ឆ្នាំ២០២០ នៅទីស្តីការក្រុមប្រឹក្សាអភិវឌ្ឍន៍កម្ពុជា,
ឯកឧត្តម ឈៀង យ៉ាណារ៉ា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការគណ:កម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា (គ.ជ.នា/ក.អ.ក) បានទទួលជួបសម្តែងការគួរសម និងពិភាក្សាការងារជាមួយលោក ម៉ាកឃឹស ប៊ឺលី (Markus Buerli) នាយកថ្មី នៃទីភ្នាក់ងារស្វីសសម្រាប់កិច្ចអភិវឌ្ឍន៍ និងសហប្រតិបត្តិការ (SDC) ប្រចាំនៅព្រះរាជាណាចក្រកម្ពុជា​ ។ គោលដៅ ចម្បងនៃជំនួបនេះ គឺដើម្បីពិភាក្សាអំពីវឌ្ឍនភាពនៃកិច្ចសហប្រតិបត្តិការអភិវឌ្ឍន៍កម្ពុជា-ស្វីស និងផ្លាស់ប្តូរយោបល់ និងបទពិសោធន៍ការងារ ដើម្បីបន្តពង្រឹង និងពង្រីកកិច្ចសហប្រតិបត្តិការអភិវឌ្ឍន៍ និងភាពជាដៃគូនាពេលអនាគត ។

ឯកឧត្តមរដ្ឋមន្រ្តី ឈៀង យ៉ាណារ៉ា បានសម្តែងការសា្វគមន៍យ៉ាងកក់ក្តៅចំពោះ លោក ម៉ាកឃឹស ប៊ឺលី ដែលត្រូវបានរដ្ឋាភិបាលសហព័ន្ធស្វីស តែងតាំងជានាយកថ្មី នៃទីភា្នក់ងារ (SDC) ប្រចាំកម្ពុជាព្រះរាជាណាចក្រ កម្ពុជា ។ ឯកឧត្តមរដ្ឋមន្រ្តី បានគូសបញ្ជាក់ថា យុទ្ធសាស្រ្តស្តីពីកិច្ចសហប្រតិបត្តិការអភិវឌ្ឍន៍ស្វីសសម្រាប់កម្ពុជា គឺបានតម្រឹម និងឆ្លើយតបយ៉ាងល្អប្រសើរទៅនឹងអាទិភាពរបស់រាជរដ្ឋាភិបាលកម្ពុជា ដែលផ្តោតសំខាន់លើអាទិភាពចំនួន ៣ រួមមាន៖ ១) វិស័យអប់រំ បណ្តុះបណ្តាលវិជ្ជាជីវៈ និងការងារ, ២) វិស័យកសិកម្ម និងសន្តិសុខស្បៀង និង ៣) វិស័យអភិបាលកិច្ច, ការចូលរួមរបស់ប្រជាពលរដ្ឋ និងសុខាភិបាល ។ ក្នុងនាមរាជរដ្ឋាភិបាលកម្ពុជា ឯកឧត្តមរដ្ឋមន្រ្តី បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលសហព័ន្ធស្វីស និងប្រជាជនស្វីស ដែលបានរួមចំណែកយ៉ាងសំខាន់ក្នុងកិច្ចអភិវឌ្ឍន៍នៅកម្ពុជា និងបន្តគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងកិច្ចអភិវឌ្ឍន៍ប្រកបដោយបរិយាប័ន្ន និងចីរភាព ។ ទន្ទឹមនឹងនេះ ឯកឧត្តមរដ្ឋមន្រ្តី បានវាយតម្លៃខ្ពស់ចំពោះការរួមចំណែករបស់ស្វីស ក្នុងការឆ្លើយតបទៅនឹងការរីករាលដាលនៃជំងឺកូវីដ-១៩ ពិសេសនៅកម្ពុជា តាមរយៈ ការគាំទ្រដល់ប្រជាជនតាមមូលដ្ឋាន, ជនងាយរងគ្រោះ និងប្រជាជនចំណាកស្រុកដែលត្រឡប់មកពីប្រទេសជិតខាង នៅក្នុងខេត្តមួយចំនួនព្រមទាំងការផ្តល់ការគាំទ្រចំណូលសម្រាប់រយៈពេលខ្លីតាមរយៈកម្មវិធីសាច់ប្រាក់ ពលកម្ម ។

លោក ម៉ាកឃឹស បានសម្តែងនូវសេចក្តីរីករាយដែលបានមកបំពេញការងារជានាយកថ្មីទីភា្នក់ងារ SDC ប្រចាំកម្ពុជា និងបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងវឌ្ឍនភាពសម្រេច បានក្នុងកិច្ចអភិវឌ្ឍន៍កម្ពុជា ។ ជាមួយគ្នានេះ លោក ក៏បានវាយតម្លៃខ្ពស់ និងកោតសរសើរចំពោះក្រុមប្រឹក្សា-អភិវឌ្ឍន៍កម្ពុជា ក្នុងការសម្រេចបាននូវវឌ្ឍនភាពសំខាន់ៗ ក្នុងការអនុវត្តគោលការណ៍ភាពជាដៃគូសកល ស្តីពី ស័ក្កិសិទ្ធភាពក្នុងកិច្ចអភិវឌ្ឍន៍ និងភាពជាដៃគូ ក៏ដូចជាការបន្តផ្តល់កិច្ចសហការ និងភាពជាដៃគូយ៉ាងល្អប្រសើរ ជាមួយរដ្ឋាភិបាលសហព័ន្ធស្វីស តាមរយៈទីភ្នាក់ងារ SDC ប្រចាំកម្ពុជា ។ ក្នុងជំនួបនេះ លោក ម៉ាកឃឹស បានបញ្ជាក់ជូន ឯកឧត្តមរដ្ឋមន្រ្តី អំពីវឌ្ឍនភាពនៃការអនុវត្តយុទ្ធសាស្រ្តស្តីពីកិច្ចសហប្រតិបត្តិការស្វីស សម្រាប់កម្ពុជា ក្នុងក្របខណ្ឌកិច្ចសហប្រតិបត្តិការតំបន់ទន្លេមេគង្គ ឆ្នាំ២០១៨-២០២១ ដែលផ្តោតការគាំទ្រដល់ប្រទេសកម្ពុជា និងឡាវ ព្រមទាំងការគាំទ្ររបស់ស្វីសដល់ការអនុវត្តយុទ្ធសាស្រ្តរបស់អឺរ៉ុប ស្តីពីកិច្ចសហប្រតិបត្តិការអភិវឌ្ឍន៍ សម្រាប់កម្ពុជា ឆ្នាំ២០១៤-២០១៩ និងសម្រាប់ដំណាក់កាលបន្ទាប់ផងដែរ ។ បន្ថែមលើនេះ លោក ក៏បានជម្រាបជូន ឯកឧត្តមរដ្ឋមន្រ្តី អំពីការត្រៀមរៀបចំយុទ្ធសាស្រ្តស្តីពីកិច្ចសហប្រតិបត្តិការស្វីសសម្រាប់កម្ពុជាឆ្នាំ២០២២-២០២៤ ដែលគ្រោងនឹងពិភាក្សា និងប្រមូលធាតុចូលពីគ្រប់ភាគីពាក់ព័ន្ធក្នុងឆ្នាំ២០២១ ខាងមុខនេះ ។ ជាការឆ្លើយតប ឯកឧត្តមរដ្ឋមន្រ្តី បានបញ្ជាក់ថា ក្រុមប្រឹក្សាអភិវឌ្ឍន៍កម្ពុជាបានត្រៀមខ្លួនរួចជាស្រេចក្នុងការផ្តល់កិច្ចសហការ និងដឹកនាំសម្របសម្រួលកិច្ចការនេះជាមួយក្រសួង-សា្ថប័នពាក់ព័ន្ធនៃរាជរដ្ឋាភិបាល ។

ឯកឧត្តម ឈៀង យ៉ាណារ៉ា រដ្ឋមន្រ្តីប្រតិភូអមនាយករដ្ឋមន្រ្តី អគ្គលេខាធិការ គ.ជ.នា/ ក.អ.ក បានថ្លែង អំណរគុណ និងជូនពរ លោក ម៉ាកឃឹស ប៊ឺលី និង សហការីទទួលបានជោគជ័យក្នុងការបំពេញបេសកកម្មនៅកម្ពុជា ។ ចុងក្រោយ ភាគីទាំងពីរសង្ឃឹមជឿជាក់ថា ទំនាក់ទំនង និងភាពជាដៃគូក្នុងកិច្ចសហប្រតិបត្តិការអភិវឌ្ឍន៍ កម្ពុជា-ស្វីស នឹងត្រូវបានបន្តពង្រឹង និងពង្រីកកាន់តែល្អប្រសើរបន្ថែមទៀតនាពេលអនាគត ៕