(សាធារណរដ្ឋប្រជាមានិតចិន)

ទីក្រុងគុនមិញ ខេត្តយូណាន សាធារណរដ្ឋប្រជាមានិតចិន៖ ក្នុងអំឡុងពេលអមដំណើរសម្តេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញចូលរួមកិច្ចប្រជុំកំពូលមហាអនុតំបន់មេគង្គ លើកទី8 នាថ្ងៃទី០៧ ខែវិច្ឆិកា ឆ្នាំ២០២៤ ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី២ ក្រុមប្រឹក្សាអភិវឌ្ឍន៍កម្ពុជា និងជារដ្ឋមន្ត្រីទទួលបន្ទុកមហាអនុតំបន់មេគង្គ (GMS) បានជួបពិភាក្សាការងារជាមួយឯកឧត្តម Wang Wenbin ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិននៅកម្ពុជា ។ ឯកឧត្តមទេសរដ្ឋមន្ត្រីបានជម្រាបជូនឯកឧត្តមអគ្គរដ្ឋទូតអំពីតួនាទីស្នូលរបស់ក្រុមប្រឹក្សាអភិវឌ្ឍន៍កម្ពុជាក្នុងកិច្ចសហប្រតិបត្តិការអភិវឌ្ឍន៍ និងការខិតខំប្រឹងប្រែងរបស់លេខាធិការដ្ឋានជាតិមហាអនុតំបន់មេគង្គ (GMS) ក្នុងការជួយសម្របសម្រួលដល់កិច្ចប្រជុំកំពូល GMS លើកទី៨ ។ ជាកិច្ចឆ្លើយតប ឯកឧត្តមឯកអគ្គរដ្ឋទូតបានវាយតម្លៃខ្ពស់ក្នុងការខិតខំប្រឹងប្រែងរបស់ក្រុមប្រឹក្សាអភិវឌ្ឍន៍កម្ពុជា និងប្ដេជ្ញាបន្តពង្រឹងកិច្ចសហប្រតិបត្តិការក្នុងក្របខ័ណ្ឌទ្វេភាគី និងពហុភាគីបន្ថែមទៀត ។