(ភ្នំពេញ)

នាព្រឹកថ្ងៃសុក្រ ៦កើត ខែភទ្របទ ឆ្នាំម្សាញ់ សប្ដស័ក ព.ស. ២៥៦៩ ត្រូវនឹងថ្ងៃទី២៩ ខែសីហា ឆ្នាំ២០២៥, នៅទីស្ដីការក្រុមប្រឹក្សាអភិវឌ្ឍន៍កម្ពុជា ឯកឧត្តម រ៉ិត វុទ្ធី អគ្គលេខាធិការ នៃគណៈកម្មាធិការសហប្រតិបត្តិការអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា (គ.ស.អ.ក/ក.អ.ក) បានទទួលជំនួបពិភាក្សាការងារជាមួយបណ្ឌិត ស្ទេហ្វាន់ ហាន់សែលម៉ាន់ ប្រធានគម្រោងការលើកកម្ពស់ភាពប្រកួតប្រជែងនៃសហគ្រាសនៅកម្ពុជា(ICONE) របស់ទីភ្នាក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិ (GIZ) និងសហការីដើម្បីពិភាក្សាអំពីទិសដៅនៃការអនុវត្តគម្រោងICONE ដំណាក់កាលទី ២ នៅកម្ពុជា ។ ឯកឧត្តមអគ្គលេខាធិការបានវាយតម្លៃខ្ពស់ពីគម្រោងICONE ដែលបាន និងកំពុងអនុវត្តយ៉ាងជោគជ័យ ហើយទិសដៅរបស់គម្រោងICONE ពិតជាស្របតាមទិសដៅអាទិភាពរបស់រាជរដ្ឋាភិបាលកម្ពុជា ក្នុងការបន្តពង្រឹងភាពប្រកួតប្រជែងរបស់វិស័យឯកជននៅកម្ពុជាឱ្យកាន់តែខ្លាំងក្លា និងចូលរួមចំណែកដល់ការអភិវឌ្ឍសេដ្ឋកិច្ចប្រកបដោយចីរភាព ។ គម្រោងការលើកកម្ពស់ភាពប្រកួតប្រជែងនៃសហគ្រាសនៅកម្ពុជា មានរយះពេលអនុវត្តពី ឆ្នាំ ២០២២ ដល់ ២០២៥ និងបានពន្យារការអនុវត្តដល់ ខែ មីនា ឆ្នាំ ២០២៦ ក្នុងទំហំទឹកប្រាក់ ប្រមាណ១០លានអឺរ៉ូ ។