(ភ្នំពេញ)

នារសៀលថ្ងៃព្រហស្បតិ៍ ១៦កើត ខែទុតិយាសាឍ ឆ្នាំមមី អដ្ឋស័ក ព.ស.​ ២៥៧០ ត្រូវនឹងថ្ងៃទី១៦ ខែកក្កដា ឆ្នាំ២០២៦ នៅក្រុមប្រឹក្សាអភិវឌ្ឍន៍កម្ពុជា ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធាន​ទី ២ ក្រុមប្រឹក្សាអភិវឌ្ឍន៍កម្ពុជា (ក.អ.ក) បានទទួលជួបពិភាក្សាការងារជាមួយលោក Reto Grueninger​ នាយកកិច្ចសហប្រតិបត្តិការ​ នៃទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការប្រចាំកម្ពុជា​​ ។ គោលបំណងចម្បងនៃជំនួបនេះ គឺដើម្បីពិភាក្សាអំពីវឌ្ឍនភាពនៃកិច្ចសហប្រតិបត្តិការអភិវឌ្ឍន៍រវាងកម្ពុជា និងស្វីស និងផ្លាស់ប្តូរយោបល់លើទិសដៅ និងអាទិភាព សម្រាប់ការរៀបចំកម្មវិធីសហប្រតិបត្តិការសម្រាប់តំបន់អាស៊ីអាគ្នេយ៍​ ឆ្នាំ២០២៧-២០៣០ ។
ភាគីទាំងពីរ បានវាយតម្លៃខ្ពស់ចំពោះវឌ្ឍនភាព ដែលសម្រេចបានគួរឱ្យកត់សម្គាល់ក្រោមក្របខណ្ឌកម្មវិធីសហប្រតិបត្តិការស្វីសសម្រាប់តំបន់មេគង្គ ឆ្នាំ២០២២-២០២៦ ។ លើសពីនេះ ឯកឧត្តមទេសរដ្ឋមន្ត្រី បានបង្ហាញការគាំទ្រជាគោលការណ៍ចំពោះសេចក្តីព្រាងកម្មវិធីសហប្រតិបត្តិការសម្រាប់តំបន់អាស៊ីអាគ្នេយ៍ ឆ្នាំ២០២៧-២០៣០ ដែលភាគីស្វីសបានរៀបចំឡើងស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា និងគ្រោងរៀបចំកិច្ចប្រជុំពិគ្រោះយោបល់ជាមួយក្រសួង និងស្ថាប័នពាក់ព័ន្ធលើសេចក្តីព្រាងកម្មវិធីនេះ នាខែកញ្ញា ឆ្នាំ២០២៦ ខាងមុខ ។