(ភ្នំពេញ)

នាថ្ងៃព្រហស្បតិ៍ ១២រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៨ ខែតុលា ឆ្នាំ២០២៦, តំណាងរាជរដ្ឋាភិបាលកម្ពុជា ឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី២ នៃក្រុមប្រឹក្សាអភិវឌ្ឍន៍កម្ពុជា បានចុះហត្ថលេខាលើកិច្ចព្រមព្រៀងអនុវត្តគម្រោង “ការលើកកម្ពស់ភាពប្រកួតប្រជែងនៃសហគ្រាសនៅកម្ពុជា ដំណាក់កាលទី ២” (Implementation Agreement on Improved Competitiveness of National Enterprises Phase II – ICONE II) ជាមួយលោក Hans-Juergen Cassens ប្រធានគម្រោង ICONE II នៃទីភ្នាក់ងារសហប្រតិបត្តិការអន្តរជាតិអាល្លឺម៉ង់ (GIZ) តំណាងឱ្យរដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ ។ ពិធីចុះហត្ថលេខានេះ មានការចូលរួមជាសាក្សីភាពដោយ លោកជំទាវ Silke Röfer ឯកអគ្គរដ្ឋទូតនៃសាធារណរដ្ឋសហព័ន្ធអាល្លឺម៉ង់ប្រចាំព្រះរាជាណាចក្រកម្ពុជា តំណាងជាន់ខ្ពស់នៃរាជរដ្ឋាភិបាលកម្ពុជា និងដែលជាសមាជិកគណៈកម្មាធិការដឹកនាំការងារ​ រួមទាំងក្រុមការងារ GIZ ICONE II, សរុបប្រមាណ ៥០ រូប ក្នុងឱកាសនៃការប្រកាសដាក់ឱ្យអនុវត្តជាផ្លូវការនូវដំណាក់កាលថ្មីនៃគម្រោង ICONE II ។

ក្នុងដំណាក់កាលទី ២​ នេះគម្រោងមានទំហំទឹកប្រាក់សរុបប្រមាណ ៨ លានអ៊ឺរ៉ូ សម្រាប់អនុវត្តរយៈពេល ៤ឆ្នាំ ពីឆ្នាំ២០២៦-២០៣០ ។ ការណ៍នេះបានបញ្ជាក់ពីការប្តេជ្ញាចិត្តរួមគ្នា និងកិច្ចសហប្រតិបត្តិការរវាងកម្ពុជា និងអាល្លឺម៉ង់ ក្នុងការរួមចំណែកអភិវឌ្ឍន៍វិស័យឯកជន តាមរយៈការជំរុញការវិនិយោគ, ការលើកកម្ពស់ផលិតភាព, ការអភិវឌ្ឍសហគ្រាសធុនមធ្យម និងធំ, ការបណ្តុះបណ្តាលសហគ្រិនភាព, ការបង្កើតកាលានុវត្តភាពសម្រាប់ពង្រឹងភាពជាដៃគូរវាងវិនិយោគិនក្នុងស្រុក និងវិនិយោគិនបរទេស ជាពិសេសវិនិយោគិនអឺរ៉ុប, ការបង្កើនសមត្ថភាពនាំចេញ និងការលើកកម្ពស់ភាពប្រកួតប្រជែងរបស់កម្ពុជាលើទីផ្សារអន្តរជាតិ ។